Articles
Taqbaylit d awezɣi ad ak tettu
ḤAMIDUC, ACENNAY N TEQBAYLIT...
Sɣur Iɣil wis, Bgayet i Tamurt.info
Ḥmiduc, isem-is n tidet Ḥmiduc XEDDIM, d acennay ameqran n teqbaylit tazedgant. Ilul ass n 14 ɣuct 1956 deg wakud n tegrawla deg Agni n waklan deg taddart n Ɛeṭṭuc, taɣiwant n Makuda, tawilayt n Tizi wezzu, deg tmurt n yiqbayliyen (deg yiwen n useggas netta d Lwennas Meεtub). Yensa ass n 05 yunyu 2002,deg-wakud n tefsut taberkan. Ssebba n lmut-is, d yiwen waṭṭan n diri i t-yettfen aṭas aya (aṭṭan n tgeẓẓal).
06/06/2014 - 18:05 mis a jour le 06/06/2014 - 18:23 sɣur
Ibeddi-s i tikelt tamezwart ɣef usayez yella-d deg useggas deg -yiwet n tmeɣra n ucennay ameqran n teqbaylit, Dda Racid Mesbaḥi. Dinna i d-yufrar s tezlit : « A Wiza semmeḥ-as », seg yimiren icennu yal ma ara ad d-tili tegnit deg tudrin n tmurt n yiqbayliyen.
Deg tezlatin n Ḥmiduc, ad naf yecna ugar ɣef tayri, tumert, asirem, tudert n yal ass, tamurt akked umenuɣ, am: “Ay ageffur n meɣres”, “Lmeḥna-w tamezwarut”, “Si Lzayer ɣer Tunes”, “Aken kan yeffeɣ urumi”, d tiyad i yelhan aṭas...Rnu ɣer waya yesεa aɣanib d agla-s netta, win ara yeslen i uzawan-is ad at yeεqel, u yewwid amaynut i tezlit taqbaylit.
Ɣas akka tnac (12) iseggasen seg-mi yensa, mazal ar tura nssel i tezlatin-is. Aṭas n yicennayen id as yerran tajmilt, gar-asen:Farid FERRAGI,Bujemeɛa AGRAW,Kamal BASI, Buɛlam QARA,Muh U BELƐID, akked gma-s Racid XEDDIM i yellan ula d netta d acennay n teqbaylit (yesεa krad n yidebsiyen).
Abaraz-is aneggar iga-t deg uxxam n yidles « Ṭṭawes Ɛemruc » n Bgayet ass n arim 06 yebrir 1998. Ass n temdelt-is, d igiman id yerzan ɣer taddart-is akken ad t-walin i tikelt taneggart.
I usmekti, Ḥamidu yesεa ugar n 10 n yidebsiyen. Di taggara steεfu di talwit a gma-t-neɣ, ma d taqbaylit d awezɣi ad ak tettu...
Iɣil Wis i Tamurt.info
